شعیب ملک اور ثناء جاوید کی شادی، عمیر جیسوال نے مبہم پوسٹ شیئر کردی

پاکستان کرکٹ ٹیم کے سابق کپتان شعیب ملک اور اداکارہ ثناء جاوید کی شادی کے اعلان کے بعد گلوکار عمیر جیسوال نے مبہم پوسٹ شیئر کردی۔

فوٹو اینڈ ویڈیو شیئرنگ پلیٹ فارم انسٹاگرام پر عمیر جیسوال کی پوسٹ کو شعیب اور ثانیہ کی شادی پر خاموش ردعمل سمجھا جا رہا ہے۔

گلوکار نے گزشتہ رات گئے اپنے جمنگ سیشن کے دوران ریکارڈ کی گئی ویڈیو شیئر کی جس کے پس منظر میں امریکی ریپر کینڈرک لامر کا گانا ’یونائٹڈ گریو‘ یعنی ’غم میں متحد‘ لگا ہوا ہے جبکہ کیپشن میں 3:15 کا وقت درج ہے۔

انہوں نے مذکورہ گانے کے چند معنی خیز لیرکس شیئر کئے ہیں جس کے معنی کچھ یوں ہیں کہ ’امید ہے کہ اس زندگی میں تم کچھ ذہنی سکون پالو، انہیں بتا دو، بتا دو سچ بتا دو، امید کرتا ہوں تم کچھ جنت پالو، انہیں سچ بتا دو، میں کس مرحلے سے گزر رہا ہوں، 1 ہزار 8 سو 55 دنوں سے، میں گزر رہا ہوں کسی چیز سے‘۔

گلوکار عمیر جیسوال کی جانب سے شیئر کئے گئے اس گانے کے مذکورہ بول سے اندازہ ہوتا ہے کہ وہ اداکارہ ثناء جاوید کی جدائی سے دلبرداشتہ ضرور ہیں لیکن ان کے لیے نیک خواہشات بھی رکھتے ہیں اور اس مشکل وقت سے نمٹنے کے لیے ہمت جمع کر رہے ہیں۔

واضح رہے کہ گزشتہ ہفتے کو شعیب ملک کی جانب سے اداکارہ ثناء جاوید سے شادی کے اعلان کے بعد گلوکار عمیر جیسوال کی یہ باضابطہ پہلی پوسٹ ہے۔ اس سے قبل انہوں نے مختلف انسٹا اسٹوریز شیئر کرکے اپنی کیفیت کا اظہار کیا تھا۔

تاہم اس سے قبل ہفتے کے روز شعیب ملک کے اعلان سے چند گھنٹوں قبل انہوں نے دو مختلف انسٹا اسٹوریز شیئر کی تھیں جن میں سے ایک مدینہ منورہ کی گلی کی جبکہ دوسری جم سیشن سے تھی۔